ဂရန်၊ မှတ်ပုံတင်၊ လိပ်စာအတုဖြင့် မြေကွက်လွတ်တခုကို ကျပ်သိန်းသုံးထောင်ဖြင့် ရောင်းချသူများ ထွက်ပြေးတိမ်းရှောင်နေ

အလုံမြို့နယ် အောင်ဇေယျလမ်းရှိ မြေကွက်လွတ်တခုကို ဂရန်အတု၊ မှတ်ပုံတင်အတု၊ လိပ်စာအတု ပြုလုပ်ကာ ကျပ် သိန်းသုံးထောင်ဖြင့် ရောင်းချသူများ ထွက်ပြေး တိမ်းရှောင်နေကြောင်း ၎င်းမြေအား ၀ယ်ယူခဲ့သူက အောက်တိုဘာ ၂၉ ရက်တွင် News Watch ဂျာနယ်သို့ ပြောကြားခဲ့သည်။

မြေကွက်ကို ၀ယ်ယူခဲ့သူက “အရောင်းအ၀ယ်လုပ်မယ့် ပွဲစားတွေက ဒဂုံ၊ ဘောက်ထော်၊ ရန်ကင်း၊ အလုံ ဘယ် နေရာတွေလိုချင်လဲဆိုပြီး ဂရန်လေးခု လာပြတာ၊ ကျွန်တော်က အလုံက မြေကို လိုက်ကြည့်တယ်၊ မြေကွက်က ဘာ အဆောက်အဦမှ မရှိဘူး။ ဒီတော့ စည်ပင်သာယာကို သူတို့ ဂရန်နဲ့သွားကြည့်တာ ဒေါ်သန်းသန်းဝင်းပိုင် အမည်နဲ့ တကယ်ရှိတယ်ဆိုပြီး စရံသိန်းငါးဆယ်ချေပြီး အရောင်းအ၀ယ်ဖြစ်ခဲ့တယ်”ဟု ပြောကြားခဲ့သည်။

၂၀၁၄ ဇွန်လ ၃ ရက်နေ့တွင် စရံငွေ ကျပ်သိန်း ၅၀ ပေးချေအပြီး ၆ ရက်နေ့တွင် ပထမအရစ် ကျပ်သိန်း ၉၅၀ ကို CB ဘဏ်မှ ထပ်မံပေးချေခဲ့သည်ဟု ဆိုသည်။ “ပထမအရစ် သိန်းတထောင်ပေး အပြီး ကျွန်တော်က မြေကွက်ကို ခြံဝင်းသွားခတ်ချိန်မှာ မြေကွက်ပိုင်ရှင် အစစ်နဲ့ တွေ့တာပဲ။ သူကလည်း ဂရန်ပြတယ်။ ကျွန်တော့်မှာလည်း ဂရန်ရှိတယ်ဆိုတော့ စည်ပင်မှာသွားပြီး ဖြေရှင်းပါတယ်။ အဲဒီတော့မှ ကျွန်တော့် ဂရန်အတုဆိုတော့ သိရတာပါ”ဟု ပြောကြားသည်။

ယင်းကဲ့သို့ ဂရန်အတု၊ မှတ်ပုံတင်၊ သန်းခေါင်စာရင်း ပိုင်ရှင်၏ နာမည်အတုများ ပြုလုပ်ရောင်းချမှုအား သိရှိချိန်မှစ၍ ရောင်းချခဲ့သူများအား ရဲစခန်းသို့ တိုင်တန်းခဲ့သည်ဟု ဆိုသည်။ ယင်းလိမ်လည် ရောင်းချသူများထဲမှ ဒေါ်ချိုချိုမြင့်(ခ) ဆွီတီနှင့် ဒေါ်လဲ့လဲ့ဝင်းက ခေါင်းဆောင်ဖြစ်ပြီး ဒေါ်လဲ့လဲ့ဝင်းသည် မင်္ဂလာဒုံမြို့နယ် အထွေထွေအုပ်ချုပ်ရေးရုံးမှ ဒုဦးစီးမှူးဖြစ်သည်ဟု ဆိုသည်။ ယင်းနှစ်ဦးအပြင် ဒေါ်ယမင်းသောင်း၊ ဒေါ်စန်းသိင်္ဂီ(ခ)မေသူ၊ ဒေါ်သန်းသန်းဝင်း(ခ) မတူး၊ မဝေဇင်အောင်(ခ) ဘုတ်ဆုံတို့လည်း အတူတကွ ပါဝင်သည်ဟု ၎င်းကဆိုသည်။ ယင်းထဲမှ ဒေါ်သန်းသန်းဝင်းသည် ပိုင်ရှင်ဂရန်အတု ဖြစ်သောကြောင့် အပြင်တွင် တကယ်မရှိနိုင်ဘဲ ဒေါ်ချိုချိုမြင့်(ခ)ဆွီတီနှင့် ဒေါ်စန်းသိင်္ဂီသည် အဓိက တရားခံဖြစ်နိုင်ကြောင်း ၎င်းတို့ထွက်ပြေးလွတ်မြောက်နေဆဲဖြစ်ကာ မယမင်းသောင်း၊ မလဲ့လဲ့ဝင်း၊ မဝေဇင် အောင်တို့အား လသာရဲစခန်းမှ ခေါ်ယူစစ်ဆေးကာ အာမခံပေးထားသည်ဟု ဆိုသည်။

၎င်းတို့အား လသာရဲစခန်းက ပုဒ်မ ၄၂၀/၄၆၈ ၄၇၁/၁၁၄ ဖြင့် အမှုဖွင့် အရေးယူထားသည်ဟု သိရသည်။ ယင်းနှင့် ပတ်သက်၍ “ကျွန်တော်က အာမခံပေးတာကို မကျေနပ်ဘူး။ ဒီအတွက် ခရိုင်ကို စာတင် ထားတယ်။ ခရိုင်ကမှ မရရင် တိုင်း၊ ဗဟိုအထိ တက်ဦးမယ်၊ နောက်လူတွေ ကိုယ် လိုမဖြစ်အောင်ဘဲ”ဟု မြေကွက်ဝယ်ယူခဲ့ သူက ပြောသည်။

ယင်းဖြစ်စဉ်များနှင့် ပတ်သက်၍ မင်္ဂလာဒုံမြို့နယ်ထွေအုပ် ဒုဦးစီးမှူး ဒေါ်လဲ့လဲ့ဝင်းအား ဆက်သွယ်မေးမြန်းရာ ““ဒီဖြစ်စဉ်တွေနဲ့ ကျွန်မက ဘာပတ်သက်မှုမှ မရှိဘူး။ ကျွန်မနဲ့မဆိုင်တာကိုလုပ်တဲ့အတွက် တရားစွဲမယ်၊ လောလောဆယ် ၀န်ထမ်းဥပဒေအရ တာဝန်က ခဏရပ်စဲ ထားတယ်။ တရားခံတွေက ထွက်ပြေးနေ တဲ့အတွက် ရဲလုပ်ထုံးလုပ်နည်းအရ ကျွန်မဘက်က တရားစွဲလို့ မရသေးတာပါ။ ရဲစစ်ချက်ကလည်း ကျွန်မရဲ့ ကိုယ်ရေး အချက်အလက်ကိုရေးပြီး လက်မှတ်ထိုးခိုင်းတာပါ”ဟု ပြောသည်။

အလားတူ မြေဂရန်၊ မှတ်ပုံတင်အတုများဖြင့် လိမ်လည်ရောင်းချမှုများ လတ်တလောတွင် ဖြစ်ရပ် ၄ ခုခန့်ရှိနေ ကြောင်း စုံစမ်းသိရှိနေရသည်ဟု မြေ၀ယ်ခဲ့သူက ပြောကြားသည်။