ခြိမ့်ခြိမ့်သဲဆင်နွှဲ တောင်ကြီးတန်ဆောင်တိုင် မီးပုံးပျံပွဲတော်

ထင်ရှားလှပသည့် နေရာများ၊ အံ့သြ ဆန်းကြယ်သည့် နေရာများ၊ ထင်ရှားသည့် ပွဲတော်များ ရှိသည့် မြန်မာနိုင်ငံကို ကမ္ဘာ့နိုင်ငံ အနှံ့အပြားက စိတ်ဝင်စား ကြသည်။ ကမ္ဘာလှည့် ခရီးသွားများ တကူးတက လာရောက် လေ့လာ ကြည့်ရှုချင် လောက်အောင်လည်း မြန်မာတို့၏ ရိုးရာ ပွဲတော်များက ကမ္ဘာကျော် လှသည်။

မြန်မာတို့၏ ထင်ရှားသည့် ပွဲတော်များတွင် တောင်ကြီးမြို့မှ တန်ဆောင်တိုင် မီးပုံးပျံ ပွဲတော်လည်း ပါဝင်ပေသည်။ အဆိုပါ တန်ဆောင်တိုင်မီးပုံးပျံပွဲတော်ကို ၁၉၄ဝ ပြည့်နှစ်ကျော် ကာလများ ကတည်းက စတင်ပြုလုပ်ခဲ့သည်ဟု မှတ်တမ်းများအရ သိရသည်။ တန်ဆောင်တိုင်ကာလတွင် မြတ်စွာဘုရားရှင်ကို မီးပုံးပျံများ လွှတ်တင်ကာ ပူဇော်ခြင်းလည်းဖြစ်သည်။ တောင်ကြီးတန်ဆောင် တိုင်ပွဲတော်ကို မြန်မာနိုင်ငံအနှံ့အပြားမှ လာရောက်ကြသလို ကမ္ဘာလှည့် ခရီးသွားများလည်း စိတ်ဝင်တစား လာရောက်ကြသည်။ လေ့လာစေ့ငုကြသည်။ အံ့သြဘနန်းဖြစ်ကြရသည်။

တောင်ကြီးတန်ဆောင်တိုင်မီးပုံးပျံပွဲတော်တွင် နေ့ဘက်၌ လွှတ်တင်သည့် အရုပ်မီးပုံးပျံ၊ ညဘက်တွင် လွှတ်တင်သည့် ညမီးကြီးမီးပုံးနှင့် စိန်နားပန် မီးပုံးဟူ၍ ခွဲခြားထားသည်။ ယခုနှစ်မီးပုံးပျံပွဲတော်ကို အောက်တိုဘာ ၃ဝ ရက်မှစတင်၍ အဝေရာကုန်းသာယာ မီးပုံးပျံကွင်းတွင်ကျင်းပလျက်ရှိပြီး နိုဝင်ဘာ ၆ ရက်အထိ ကျင်းပသွားမည်ဖြစ်သည်။ စိန်နား ပန် မီးပုံး ၃၄ လုံး၊ ညမီးကြီးမီးပုံး ၈၄လုံး၊ နေ့လွှတ် အရုပ်မီးပုံး ၁၉၃ လုံးကို လွှတ်တင်သွားမည်ဖြစ်ရာ လာရောက်ကြည့်ရှုသူအားလုံးအားပါးတရ ကြည့်ရှုကြရ မည်ဖြစ်သည်။

တစ်နှစ်ထက်တစ်နှစ် ပိုမိုကောင်းမွန်သော၊ ဆန်းသစ်သော၊ လှပသော မီးပုံးပျံများကို တောင်ပတ်လည်ဝန်းရံထားသော အဝေရာကုန်းသာယာ မီးပုံးပျံကွင်း၌ ကြည့်ရှုရန် ဖိတ်ခေါ်လိုက်ရပါသည်။